ஜனாதிபதி வேட்பாளர்களுக்கு சிவில் சமூகத்தின் கோரிக்கைகள் | தினகரன் வாரமஞ்சரி

ஜனாதிபதி வேட்பாளர்களுக்கு சிவில் சமூகத்தின் கோரிக்கைகள்

கண்டி சமூக நிலை மாற்ற மன்றம் நடைபெறவிருக்கும் ஜனாதிபதித் தேர்தலை கருத்திற்கொண்டு, மலையகப் பிரச்சினைகளில் ஆர்வம் செலுத்திவரும் பல மலையக மன்றங்களிடையே கருத்துப் பரிமாற்றத்தை ஏற்படுத்தி கலந்துரையாடல்களை நடத்தியது. இந்தக் கருத்துப்பரிமாற்றங்களை நிறைவுசெய்து வேட்பாளர்கள் மத்தியில் ஒரு தகுந்த ஆவணத்தைச் சமர்ப்பிக்கவேண்டும் என்பது அனைத்து மன்றங்களினதும் அவாவாக இருந்தது.  

அனைத்து மலையக மன்ற பிரதிநிதிகளையும் மற்றும் அறிவுசார் துறையினரையும் ஒன்றிணைத்து கொழும்பு ரேணுகா ஹோட்டலில் அண்மையில் கருத்தரங்கு ஒன்று ஏற்பாடு செய்யப்பட்டிருந்தது. நிர்வாகத்துறையில் நீண்ட அனுபவமுள்ளவர்களும் பல்கலைக்கழக பேராசிரியர்களும் மற்றும் பல சமூக ஆர்வலர்களும் இதில் கலந்துகொண்டு பயனுள்ள பல ஆலோசனைகளை முன்வைத்தனர். இறுதியாக வரையப்பட்ட ஆவணத்தில் கீழ் காணும் விடயங்கள் உள்ளடக்கப்பட்டிருந்தன.  

1.அரசியல் யாப்பு சீர்திருத்தம் நடைபெறும்போது மலையகத் தமிழரின் தனித்துவமான அடையாளம் தெளிவாக உறுதிப்படுத்தப்பட வேண்டும். இவ்வாறு உறுதிசெய்யப்படுவதன் மூலமே இலங்கை நாட்டின் சமத்துவமான உரிமையுடைய பிரஜைகளாக மலையகத் தமிழரை ஒன்றிணைக்க முடியும். அரசியல் யாப்பு அந்தஸ்து அளிப்பதன் மூலமே மலையகத் தமிழர் தங்கள் தனித்துவமான அடையாளத்தை தக்கவைத்துக் கொள்ளமுடியும்.  

பிரதிநிதித்துவ அடிப்படையிலும் நிர்வாக அடிப்படையிலும் தேசிய, மாகாண மற்றும் பிரதேச ரீதியில் உரிய அதிகாரப்பகிர்வு செயல்முறை உருவாக்கப்பட வேண்டும்.  

பிரதேசம் மற்றும் பிரதேசம் சாராத என இரண்டுக்கும் ஒரே முறையை கடைப்பிடிக்காமல் உரிய விதத்தில் அதிகாரப் பகிர்வை மேற்கொள்ள வேண்டும்.  

தேர்தல் முறை மாற்றங்கள் நடைபெறும்போது மலையகத் தமிழரின் பிரதிநிதித்துவ உரிமைகளைப் பாதிக்காத வகையில் செயல்படுத்துவது அவசியமாகும். விகிதாசாரத்திற்கேற்ப அவர்களின் பிரதிநிதித்துவம் சகல மட்டங்களிலும் அதாவது தேசிய, மாகாண, உள்ளூர் அமைப்புகள் என்ற அடிப்படையில் இடம்பெற வேண்டும்.  

தாங்களாக வேதங்கள் சமூகம் சார்ந்த விடயங்களில் முடிவெடுக்கக் கூடியவகையிலும் அனைத்துப் பிரிவினரோடும் நல்லுறவைப் பேணி சமத்துவ நிலையை எய்தக்கூடிய வழிவகையை ஏற்படுத்த வேண்டும்.  

வரலாற்று ரீதியாக பின்தள்ளப்பட்ட மலையகத்தமிழர் முன்னேற்றத்திற்குக் காலவரையறை உடைய நடவடிக்கைகள் (affirmative action) இன்றியமையாததாகும். அரசியல் யாப்பு ரீதியாக இந்நடவடிக்கை மேற்கொள்ளப்பட வேண்டும்.  

2.பிரத்தியேகமான நிதிகளை ஒதுக்கிப் புதிதாக நுவரெலியா மாவட்டத்தில் உருவாக்கப்பட்ட பிரதேச சபைகளின் செயற்பாடுகளைத் துரிதப்படுத்த வேண்டும். அத்தோடு கொட்டக​ைல, அக்கரப்பத்தனை, நோர்வூட், மஸ்கெலியா, நுவரெலியா போன்ற பிரதேசங்களில் பிரதேச சபைகளை நிறுவுவதற்கான நடவடிக்கைகளையும் மேற்கொள்வதோடு புதிய பிரதேச சபைகளுக்கு ஒத்த பிரதேச செயலகப் பிரிவுகளை உருவாக்கி அவற்றை வளப்படுத்துவதற்கும் அமைச்சரவை முடிவெடுக்க வேண்டும்.  

3.அண்மையில் உருவாக்கப்பட்ட புதிய கிராமங்கள் அபிவிருத்தி அதிகாரசபைக்கு போதுமான நிதியை ஒதுக்கீடுசெய்து அதனுடைய பன்முகப்படுத்தப்பட்ட செயல்பாடுகளைப் பலப்படுத்த வேண்டும்.  

4.எதிர்வரும் மக்கள் தொகைக் கணக்கெடுப்பின்போது இந்தியத் தமிழர் என்பதற்கு பதிலாக மலையகத்தமிழர் என்ற பதம் இடம்பெற வேண்டும். இந்த பதம் சிங்களத்திலே "கந்துக்கரே தமிழ” என்றும் ஆங்கிலத்தில் “Hill Country Tamil” என்றும் இடம்பெற வேண்டும்.  

காணி மற்றும் வீட்டு உரிமை

5.தோட்டங்களையே தங்கள் வாழ்விடமாகக் கொண்டுள்ள தொழிலாளர்கள் மற்றும் தொழிலாளர் அல்லாத குடும்பங்களுக்கும் வீட்டு உரிமைப்பத்திரங்கள் வழங்கப்பட வேண்டும். இது அரச காணிக்கொள்கை அடிப்படையில் அமைச்சின் மூலம் வரையறுக்கப்பட்ட காலத்துக்குள் நடைமுறைப்படுத்தப்பட வேண்டும்.  

6.மலையகத் தோட்டங்களில் 1994- _ 2015வரையான காலப்பகுதியில் பல்வேறு அரசாங்கத் திட்டங்களின் கீழ் கட்டப்பட்ட 37,000வீடுகளில் வசிப்பவர்களுக்கு உடனடியாக காணி உறுதிப்பத்திரங்களை வழங்க வேண்டும்.   

7.N.B.R.O அடையாளம் கண்டுள்ளபடி நிலச்சரிவு ஆபத்து உள்ள பகுதிகளில் வசிக்கும் மக்களுக்கும், எதிர்காலத்தில் பாதிப்புக்குள்ளாகக்கூடிய மக்களுக்கும் நில விநியோகம் மற்றும் மீள்குடியேற்ற திட்டத்தை அறிமுகப்படுத்த வேண்டும். எந்தமீள் குடியேற்றத் திட்டமும் அவர்களின் வாழ்வாதாரத்தைக் கவனத்தில் கொள்ளவேண்டும். பதுளை மற்றும் ஏனைய மாவட்டங்களிலும் உடனடி நடவடிக்கைகளை மேற்கொள்ள வேண்டும்.  

பொருளாதாரம் மற்றும் வேலைவாய்ப்பு

8.ஆக்கபூர்வமான விதத்தில் தேயிலைத் தொழிற்துறை வளர்ச்சியை ஏற்படுத்தி நடவடிக்கை எடுக்கப்பட வேண்டும். அனுபவம் வாய்ந்த தோட்டத் தொழிலாளர்களிடமிருந்து தேயிலைத் தோட்டங்களுக்கான சிறு உரிமையாளர்களை உருவாக்குவதன் மூலம் தேயிலைத் தொழிற்துறையை மறுசீரமைக்கலாம். அடிப்படை அமைப்புகளான கூட்டுறவு அமைப்புகளைச் சிறந்த உற்பத்தி நிலையங்களாக மாற்றமுடியும். தற்பொழுது கைவிடப்பட்டுள்ள தோட்ட நிலங்களை மீண்டும் கையேற்று தொழிலாளர்களுக்கு வழங்க வேண்டும்.  

9.தொழிலாளர்களுடைய போதுமான ஆலோசனைகளோ அல்லது அரசாங்கத்தில் உரிய ஒப்புதலோ இன்றிப் பல்வேறு பிராந்திய தோட்ட நிறுவனங்களால் மேற்கொள்ளப்பட்ட முறையற்ற வெளிவாரி பயிர்ச்செய்கை சோதனைகளைத் தடைசெய்ய வேண்டும்.  

10.மத்திய, சப்ரகமுவ மற்றும் ஊவா மாகாணங்களில் தோட்ட இளைஞர்களுக்குத் தொழில் வாய்ப்புகளை ஏற்படுத்துவதற்காக தோட்டத்துறையிலுள்ள தொழிற்சாலைகளினுடைய தரத்தைக் கூட்டி அதன் செயற்பாடுகளை அதிகரிக்க வேண்டும்.  

மலையகத்திலிருந்து தலைநகரை நோக்கி ஒரு பாரிய இளைஞர், யுவதிகள் நகர்வு ஏற்பட்டு வருவதை அனுசரித்து கொழும்பில் ஒரு மலையக இளைஞர் மையத்தை நிறுவ வேண்டும். அத்தோடு தமிழ் மொழி மூலமான தொழிற்பயிற்சி, சட்ட உதவி மற்றும் கலாசார நிலையம் அமைக்கப்படுவதும் அவசியமாகும். இது ஆக்கத்திறன் அதிகரிப்புக்கு வழிவகுக்கும் கொழும்புக்கு குடிபெயர்ந்து வந்தவர்கள், வீடுகளில் தொழில் புரிபவர்கள், கட்டுமானத் தொழிலாளர்கள், முச்சக்கர வண்டி ஓட்டுனர்கள் மற்றும் கடை உதவியாளர்கள் உள்ளிட்ட குறைந்த ஊதியம் கிடைக்கும் தொழிலில் ஈடுபட்டுவரும் ஆயிரக்கணக்கான இளைஞர்கள், யுவதிகள் போன்றோரின் தற்போதைய திறன் மேம்பாடு, ஆளுமை விருத்தி என்பனவற்றுக்கு வாய்ப்பளிக்கும் ஒரு மையமாக இருக்க வேண்டும்.  

12.பொலிஸ் மற்றும் நீதித்துறைச் சேவைகள் உள்ளிட்ட பொதுச்சேவையில் மக்கள் தொகை விகிதாசாரத்திற்கு ஏற்ப தகுதிவாய்ந்த மலையகத் தோட்ட இளைஞர்களின் பிரதிநிதித்துவம் இடம்பெற வேண்டும். இச்சேவையில் அவர்களை இணைத்துக் கொள்வதற்கு ஒரு விசேடமான இலங்கை நிர்வாக சேவை தேர்வு (SLAS EXAM) நடத்தப்பட வேண்டும்,  

மொழி சார்ந்த உரிமைகள்

13.தமிழ் பேசும் ஊழியர்களை எல்லா அமைச்சுக்களிலும் நியமித்து, அவர்களின் சேவைகளை விரிவுபடுத்துவதன் மூலம் தோட்டத் தமிழ் மக்களுக்கு அனைத்து அமைச்சுக்களினதும் சேவைகளை பெற்றுக்கொள்ள முடியும்,  

14.தோட்டத்துறை சார்ந்த மாவட்டங்களில் ஸ்தாபிக்கப்பட்ட இரு மொழிப்பிரிவுகளில் தமிழர்களுக்கு அவர்களினுடைய மொழியிலேயே சேவைகளைப் பெற்றுக்கொள்வதனை உறுதிசெய்ய வளங்களை ஒதுக்க வேண்டும்,  

சுகாதாரம்  

15.தோட்டப் பகுதிகளிலுள்ள வைத்தியசாலைகளை தேசிய சுகாதார அமைப்போடு இணைப்பதற்கான அரசாங்கத்தின் பல தசாப்தகால கொள்கை முடிவானது விரைவாக செயல்பட வேண்டும்.  

16.தோட்டத் தொழிலாளர்கள் பெரும்பான்மையாக வரக்கூடிய வைத்தியசாலைகளில் தமிழ் பேசக்கூடிய ஊழியர்களை கட்டாயமாக நியமிக்க வேண்டும்.  

17.நடவடிக்கையின் (affirmative action) ஒரு பகுதியாக மிகவும் மோசமான சுகாதார குறிகாட்டிகளை கொண்ட தோட்ட சமூகங்களை மையமாகக் கொண்டு விசேடமான ஊட்டச்சத்து நிகழ்ச்சித்திட்டமொன்றை விரைவாக செயல்படுத்த வேண்டும்.  

கல்வி

18.அறிவியல், கணிதம், ஆங்கிலம் மற்றும் தொழில்நுட்பம் ஆகியவற்றை கவனத்தில் கொண்டு இரண்டாம் நிலை மட்டத்தில் தோட்டக் கல்வித்துறைக்கு ஆசிரியர் ஆட்சேர்ப்பு, துணை கற்பித்தல் ஆகியவற்றில் உட்கட்டமைப்பு ஆதரவுடன் கல்வியில் ஓர் உறுதியான செயல்திட்டம் நடைமுறைப்படுத்த வேண்டும்.  

19.மலையகத் தமிழ்ச் சமூகம் மற்றும் தோட்டத் தொழிற்துறையின் நடைமுறைகள், சமூகப் பொருளாதார, அரசியல், கலாசார பிரச்ச்சினைகள் குறித்த ஆராய்ச்சிகளை மேற்கொள்வதற்கும் அவற்றை கற்பிப்பதற்கும் பேராதனை, சபரகமுவ, ஊவாவெல்ல போன்ற பல்கலைக்கழகங்களுடன் தொடர்புடைய வகையில் ஒரு துறை அல்லது அலகு அல்லது ஒரு நிலையம் நிறுவப்பட வேண்டும்  

20.நுவரெலியா, பதுளை, கண்டி மற்றும் கேகாலை போன்ற இடங்களில் அனைத்து மொழி ஊடகங்கள், விளையாட்டு வசதிகள், விடுதி வசதிகள் என்பவற்றை உள்ளடக்கிய வகையில் மத்தியக்கல்லூரி நிறுவப்படுதல் அவசியமாகும்.  

21.தோட்டப்பகுதிகளில் தமிழ் மொழி மூலமான பயிற்சிநெறிகளை வழங்கும் தொழிற்பயிற்சி மையங்கள், விதாதா மையங்கள் மற்றும் பயிற்சிக் கல்லூரிகள் என்பவற்றின் எண்ணிக்கையை அதிகரிக்க வேண்டும்.  

நலன்புரி மற்றும் பிறசேவைகள்

22.தேசிய அஞ்சல் சேவைகளை தோட்டங்களுக்கு விரிவுபடுத்த வேண்டும். இதனால் தோட்ட சமூகங்களும் அரசாங்கத்தின் சேவைகளை பெற்றுக் கொள்ள முடியும்.  

23.வீதி அபிவிருத்தி அதிகார சபை மற்றும் மாகாண சபைகள் அல்லது பிரதேச சபைகள் என்பவற்றின் கீழ் தோட்டப்பகுதி பாதைகளைக் கொண்டுவருவதன் மூலம் அவற்றை தேசிய வலையமைப்பிற்குள் இணைக்க முடியும். இதனால் பாதைகளைச் சிறந்த முறையில் பராமரிக்க முடியும்.  

24.பிரதேச செயலகங்களில் கலாசார மையங்களை நிறுவுதல் வேண்டும். குறிப்பிடத்தக்க மலையகத் தமிழ் சமூகம் வாழும் இடத்தில் தமிழ் கலாசார அதிகாரிகளை நியமித்தல் அவசியமாகும்.  

25.மலையகத் தோட்டங்களில் பல இடங்கள் பேரழிவுக்குள்ளாகக் கூடியவை என அடையாளம் காணப்பட்டுள்ளன. அத்தகைய பிரதேசங்களில் ஆபத்தைக் குறைப்பதற்கு அவசரகால நடவடிக்கைகளை மேற்கொள்ள வேண்டும்.  

சூழல் பாதுகாப்பு

26.மலையக நீரேந்து பிரதேசங்களைப் பாதுகாப்பதுடன் சமூகத்திற்கு சுத்தமான குடி நீரை வழங்கவும்.

Comments