பாடசாலை நண்பர் ஒருவரை சந்திப்பதற்காக திருகோண மலை செல்லவிருந்தேன். எனது வருகையை நண்பரிடம் தெரிவித்த போது, 'நிச்சயமாக வருமாறு ௯றிய அவர், வரும் போது கற்பிட்டியில் இருந்து கட்டாக் கருவாடு வாங்கிக் கொண்டு வருமாறு ௯றினார்'. கற்பிட்டியைச் சேரந்த ஒருவர் தனது நண்பரையோ அல்லது உறவினரையோ சந்திக்கச் சென்றால் எல்லாரும் அவர்களிடம் எதிர்பார்ப்பது அனேகமாக கருவாட்டைத்தான். ஏனென்றால் கற்பிட்டி என்றாலே எல்லாருக்கும் தெரிவது கருவாடுதான்.
கற்பிட்டியில் உற்பத்தி செய்யப்படும் உப்புக் கருவாட்டுக்கு இலங்கையில் மட்டுமல்ல வெளிநாடுகளிலும் மவுசுதானே...
உள்நாட்டிலிருந்தும், வெளிநாட்டிலிருந்தும் புத்தளத்திற்கு வருகை தரும் உள்நாட்டு, வெளிநாட்டு சுற்றுலாப் பயணிகள் கற்பிட்டி நகருக்கு விஜயம் செய்வதுடன், கற்பிட்டியில் கருவாடு வாங்கிச் செல்வதற்கும் மறக்கவே மாட்டார்கள்.
வாய்க்கு எவ்வளவு ருசியான சாப்பாடு கிடைத்தாலும், பழைய சோற்றுடன் வெங்காயம், பச்சை மிளகாய் சேர்த்து சுட்ட அல்லது பொறித்த உப்புக் கருவாட்டுடன் சாப்பிடும் ருசி என்பது தனி ருசிதானே. அவ்வாறு சாப்பிட்ட யாராலும் அந்தச் சாப்பாட்டின் ருசியை மறக்க முடியாது.
உப்புக் கருவாடு எங்கும் கிடைப்பதில்லை, ஒருசில இடங்களில் மாத்திரமே பெற்றுக்கொள்ள முடியும். புத்தளத்தில் உப்புக் கருவாட்டுக்கு பெயர் போன இடம் கற்பிட்டி ஆகும். கற்பிட்டி கருவாட்டுக்கு எப்போதும் , எங்குமே கேள்வி உள்ளது.
கற்பிட்டி நகரில் ஆணவாசல, துறையடி மற்றும் தீவு போன்ற இடங்களில்தான் அதிகளவில் கருவாடு உற்பத்தி செய்யப்படுகிறது.
அங்கு உற்பத்தி செய்யப்படும் கருவாடுகள் கற்பிட்டி நகரில் உள்ள கடைகளில் விற்பனைக்காக வைக்கப்படுகிறது. மாத்திரமின்றி, கற்பிட்டி கருவாடுகளை உற்பத்தி செய்யும் மீனவர்கள் அதனை விற்பனை செய்வதற்கு பெரிதும் கஷ்டப்படுவதில்லை. குறித்த கருவாடுகளை கொள்வனவு செய்வதற்காக உள்ளூர் மற்றும் வெளியூர் வியாபாரிகள் போட்டி போட்டுக்கொண்டு கருவாடுகளை கொள்வனவு செய்கிறார்கள். ஒவ்வொரு கருவாட்டுக்கும் ஒவ்வொரு வாசனை.
கற்பிட்டி நகரில் கருவாடு உற்பத்தி செய்யும் வாடி ஒன்றுக்கு நண்பன் இர்பானுடன் சென்றேன்.
எங்கு பார்த்தாலும் சூறை, கீரி, கட்டா, காரல் மற்றும் தளப்பத்து என எல்லா வகையான கருவாடுகளும் மிகவும் அழகான முறையில் நேர்த்தியாக அடுக்கியும், தொங்கவும் விடப்பட்டிருந்தமையை அவதானிக்க முடிந்தது. பார்ப்பதற்கு அது மிகவும் அழகாக காட்சியளித்து. அதில் அதிவிஷேசம் அனைத்து கருவாடுகளும் ஒரே மாதிரியாக சுத்தம் செய்யப்பட்டுள்ளதும், சுத்தமாக இருப்பதுமே.
கற்பிட்டி நகரில் கருவாடு உற்பத்தி செய்வதில் பல வருட அனுபவங்களை பெற்ற ஆணவாசல இம்மானுவேல் பர்னாண்டோ என்பரை அவரது வாடியில் சந்தித்து பேசினேன்.
'கருவாட்டு உற்பத்தியில் முன்பு போல வியாபாரம் இப்போது இல்லை. நான் பெரிதும் நஷ்டப்பட்டுக் கொண்டிருக்கிறேன்' என்று தனது பேச்சை ஆரம்பித்தார் இம்மானுவேல்.
'மீன்களை குறைந்த விலையில் விற்பதற்கு மீனவர்கள் தயங்குகின்றனர். கருவாட்டை அதிக விலை கொடுத்துவாங்க நுகர்வோரான மக்கள் மறுக்கின்றனர். இலாபமில்லாவிட்டாலும், செலவுகளையாவது சமன்செய்யும் அளவுக்கு காசு கிடைத்தால் போதும் என்ற நிலையில் கருவாட்டு உற்பத்தி செய்து விற்பனை செய்கிறோம்'
எனது சொந்த ஊர் பூக்குளம். 1990 ஆம் ஆண்டு இடம்பெயர்ந்து புத்தளம் கற்பிட்டிக்கு வந்து தீவுப் பகுதியில் பத்து வருடங்களாக மீன்பிடித் தொழிலை செய்து வந்தேன்.
மீன்பிடித் தொழிலில் அதிக இலாபம் கிடைத்தது. கற்பிட்டி கருவாட்டுக்கு எங்கும் அதிக கேள்வி இருந்தமையால், மீன்பிடித் தொழிலை விட்டுவிட்டு கருவாடு உற்பத்தி செய்ய ஆரம்பித்தேன்.
நான் மீன் பிடிப்பதற்காக கடலுக்கு செல்வதில்லை. மீன் வாடிகளில் இருந்து கிடைக்கும் நல்ல மீன்களையே கருவாடு உற்பத்தி செய்யபயன்படுத்துகிறோம் என்றார்.
அப்போது இடையில் குறுக்கிட்ட நான் பெரும்பாலும் பழுதடைந்த மீன்கள்தான் கருவாடு செய்வதற்காக பயன்படுத்தப்படுகிறது என்கிறார்களே இது உண்மையா எனக் கேட்டேன்.
அப்படிச் செய்பவர்களும் இருக்கிறார்கள் மறுப்பதற்கில்லை. ஆனால், நான் அப்படி செய்வதில்லை. சுத்தமான மீன்களை கொள்வனவு செய்தே கருவாடு செய்கிறோம்.
வாடியில் இருந்து கொண்டுவரப்படும் கட்டா, கெளுர், செரயா, குளுவி, சூரை , கீரி போன்ற மீன்களை நன்றாக கழுவி, வெட்டி, தூள் உப்பிட்டு ஒருநாளைக்கு அப்படியே உலர வைப்போம். பொதுவாக எல்லா கருவாடுக்கும் மக்கள் மத்தியில் வரவேற்புள்ளது.
உலர வைத்த மீன்களை மறுநாள், எடுத்து மீண்டும் அதனை நன்றாக கழுவி பின்னர் பாதுகாப்பு முறைகளை பயன்படுத்தி காயவைப்போம்.
பறவைகள், பறவைகளின் எச்சங்கள் , விலங்குகள் , அதனது எச்சங்கள் என்பன படாத வகையில் கருவாட்டை நன்றாக காயவைத்து எடுப்போம். இந்தக் கருவாடு பல மாதங்கள் அப்படியே பழுதாகாமல் இருக்கும். நிறமும் அதனது மணமும் குறையாமல் அப்படியே இருக்கும்.
மழைக் காலங்களில்தான் கருவாடு காயவைப்பதற்கு பெரிதும் சிரமமானது. அப்போதுதான் அதிகளவில் நஷ்டத்தையும் எதிர்கொள்ள வேண்டி வரும். மீன்கள் அதிகமாக பிடிக்கப்படும் காலங்களில் அதிக இலாபத்தை ஈட்டிக்கொள்ள முடியும். மற்றைய காலங்களில் கடனில்லாமல் சாப்பிடுவதற்கும், தொழிலாளர்களுக்கு சம்பளத்தை கொடுப்பதற்கும், என்னுடைய வாகனத்திற்கு ( லொறி) பினான்ஸ் கட்டுவதற்கும் சரியாகிடும்.
முன்பை விட தற்போது இந்த தொழிலில் போட்டித் தன்மை ஏற்பட்டுள்ளது. அதனால், கற்பிட்டி கருவாட்டுக்கு ஒரு நிரந்தர விலை இல்லை. ஒவ்வொருவரும் தமக்கு தேவையான இலாபல் கிடைத்தால் போதும் என்று தாம் உற்பத்தி செய்த கருவாட்டை சந்தையில் விற்பனை செய்கிறார்கள்.
சில நேரங்களில் இலாபத்தைக் கொடுக்கும், சில நேரங்களில் பாரிய நஷ்டத்தையும் கொடுக்கும். எனது வாடியில் மூவர் வேலை செய்கிறார்கள். நானும், மனைவி மற்றும் மகனும் சேர்ந்து வேலை செய்வதால்தான் ஓரளவுக்கு நஷ்டமில்லாமல் இந்த தொழிலை முன்னெடுத்துச் செல்கிறோம்.
அதுமட்டுமல்ல, எனது வாடியில் வேலை செய்யும் தொழிலாளிகளுக்கு நாட்௯லிதான் கொடுக்கிறேன்.
எமக்கு சிரமப்படுவதற்கு உரிய ஊதியம் இதில் கிடைப்பதில்லை என்றாலும், சுத்தமான, தரமான கருவாட்டை நுகர்வோருக்கு கொடுக்க வேண்டும் என்பதில் நான் மிகவும் கவனமாக இருக்கிறேன்.
எனக்கு சுத்தம் மிகவும் முக்கியமாகும். சுத்தமான கருவாடுகளை மக்களுக்கு கொடுக்க வேண்டும் என்பதில் நான் அன்று முதல் இன்று வரை உறுதியாக இருக்கிறேன்.
அதனாலேயே இன்றும் எனது கருவடை்டை பல இடங்களில் இருந்து தேடி வந்து வாங்கிக் கொண்டு செல்கிறார்கள். அது மட்டுமன்றி, இங்கு வருகை தரும் வெளிநாட்டு சுற்றுலாப் பயணிகள் ௯ட கற்பிட்டி உப்புக் கருவாட்டை மிகவும் விரும்பி சாப்பிடுவார்கள்.
நூறு கிலோ மீனை வெட்டினால் 48 கிலோ கருவாடுதான் கிடைக்கும். ஆனால், அந்த கருவாடு உற்பத்திக்கான செலவு அதிகமானது. இறால் கருவாட்டின் விலையும் அதிகம்.
கற்பிட்டி கடலில் பிடிக்கப்படுகின்ற மீன்கள் விற்பனைக்காக வெளியிடங்களுக்கு கொண்டு செல்லப்படுவதால் இங்கு மீன்களுக்கு தட்டுப்பாடு காணப்படுகிறது. மீன்களுக்கு தட்டுப்பாடில்லாமல் குறைந்த விலையில் கிடைக்குமானால் கருவாட்டையும் குறைந்த விலையில் விற்பனை செய்ய முடியும் என்கிறார் பர்னாண்டோ.
கருவாட்டை உற்பத்தி செய்வதற்கு நீங்கள் எதிர்நோக்கும் சவால்கள் என்ன என்று கேட்டதற்கு, அப்படி பெரிதாக ஒன்றுமில்லை. குறைந்த விலையில் மீன்களை கொள்வனவு செய்ய முடிந்தால் நாங்கள் தரமான, சுத்தமான கருவாட்டை குறைந்த விலையில் நுகர்வோருக்கு வழங்க முடியும் என நினைக்கிறேன். அதற்கு அரசாங்கம்தான் நல்ல பதில் தரவேண்டும் என்று கவலையுடன் ௯றி முடித்தார் இம்மானுவேல்.
உப்புப் கருவாட்டை கொள்வனவு செய்யும் நாங்கள் 'விலை அதிகம்' என்று ௯றி மீனவர்களை திட்டித்தீர்க்கிறோம்.
தரமில்லாத வெளிநாட்டு கருவாட்டை முகம் சுளிக்காமல் அதிக விலை கொடுத்து வாங்கும் நாங்கள் எமது உள்நாட்டில் உற்பத்தி செய்யப்படுகின்ற தரமான கருவாடுகளை வாங்கத் தயக்கம் காட்டுகின்றோம். 'விலை அதிகம்' என்று குறைத்த விலைக்கு கொள்வனவு செய்ய முயற்சிக்கிறோமே தவிர, கருவாட்டு உற்பத்தியாளர்களை ஊக்குவிப்பதற்கு தவறிவிடுகிறோம்.
கருவாட்டை உற்பத்தி செய்வதற்கு மீனவர்கள் எதிர் நோக்கும் கஷ்டங்கள் விபரிக்க முடியாதவை. நேரில் பார்ப்பவர்கள் மட்டுமே அதனைப் புரிந்து கொள்ளக் ௯டியதாக இருக்கும்.
என்னதான் சொல்ல முடியாத கஷ்டங்கள் ஏற்பட்டாலும், தம்மை நம்பி வாழும் நுகர்வோரான பொது மக்களுக்கு தரமான கருவாட் டைக் கொடுக்க வேண்டும் என நினைக்கும் கற்பிட்டி மீனவர்களின் கருவாட்டு வியாபாரம் எப்போதும் களைகட்டிக்கொண்டே இருக்கிறது என்பது மட்டும் உண்மை.
ரஸீன் ரஸ்மின் - கற்பிட்டி தினகரன் விஷேட நிருபர்
